أحمد الصانع | .. [ قـوافـي ] ..!

:

:

مساء / صباح الخير جميعًا ..

كُل عام وأنتم بخير ،
و مبارك عليكم الشهر ..

هُـنا ..
سأقوم بـ كتابة قصيدة كل يوم خلال الشهر الفضيل ..
كما كنتُ معكم في السنه الماضيه

يوميّات مواطن جوعان [ 1 ]

لقلوبكم

:

[ 3 ] ..

مدخل :

مشتاق هذا اليوم - لك ، لااا تأجّل
أبي تقابل شوقي بـ شوق .. { عاجل }
[ فارِسْك ] . . من ظهر السعاده ترجّل
صدره " سما " وأحزانه طيور " زاجل "

:

أجيك تروح !!
أغلّف لك فَرَح عمري هديّه ، وتنعسِف لك روح
- على النيّه ولا أدري { تخيّط } من وفاي جروح
وألبس ( ثوب أحزاني )
وألقاني - أنا : ثاني !!
تصوّر فوق كل هذا على كل ماحصل مسموح

بعد ما غابت أفراحي . . . عن عيوني ، ولا ردّت
أحس الموت وأتعايش ، وأقول لْـ غلطتك : عدّت
أعديّها على شانك وأسامح . . كل شي و أنسى
وأنا عندي كثير جروح
أحن لـ فرحتي - تقسى !
و أجيك تروح !

:

مخرج :

لا تلوم القلب وضلوعك سجن
فرحته .. تسأل عليه وما جته
من يبي حاجه على ربه " يحن "
في دعائه لأجل يقضي حاجته

- سواد قلوب ،

[ 4 ] ..

مَرَض ما غاب عن دنياي لحظه
سواد قلوب ونيّة قلبي ، " بيضه "

حَسَد - غِيره ، جهل كلمة يا حظه
طويل الوصل - والفرقى عريضه

عِجَز ( قلبي ) على تفسير نبضه
وكل ما إرتاح نبضاته ~ تغيظه !

رفضها فرحتي و أسباب رفضه :
- كثير عقول في عمري مريضه

عطيته كل { كلّي } وين بعضه ؟
أحس الجرح في سلمه فريضه

سكوتي من ذهب ما كان فضه
عزيزة نفسي والنيّات ( بيضه )

:

- تكرم عيون القلب ،

[ 5 ] ..

اليوم خامس يوم ، من فرقاهم
و البال مشغلني على - طاريهم

" القلب " عيّى يا بشر ينساهم
( تكرم عيون القلب ) وآداريهم

لأنْها - حياتي ، ضايعه ويّاهم
و إن بعت حُبهم خافقي شاريهم

عاف الحبايب لأجل من يهواهم
مسكين [ قلبي ] عايش يباريهم

قررت بيني وبيني - ما ألقاهم
لكني ببقى دوم .... في طاريهم

:

- غيم وحزن ،

[ 6 ] ..

آنا أطالع للـ سما - وألمَح ضياع
و إنتْ أصلاً تنتهي مثل " الشموع "

إقنَع المجروح ، بادر في الدفاع
القناعه كنز وتدري إنّي - قنوع

بالكِذِب شاطر وبارع فـ الخداع
والضحيّه ( قلب ) أمّن للضلوع

يا حبيبي الحُب في الدنيا " متاع "
نوع واحد . . والخلايق كم نوع

لك أحاسيسي من اللهفه - جياع
وإنتْ تدري وعاجبك إنّي أجوع !

ما بكت عين السما ، وقت الوداع
غيم وحزن تصادموا طاحت دموع

:

- إرتفَع صيتك ،

[ 7 ] ..

عَهَد .. يا هـ اللسان المبتلي في لدغة حروفه
لأطلق سرب من صدر المشاعر و الهدف بيتك

نَعَم . . يا قلب حاصرني غلاه ، وجيته أشوفه
لأنه الدين { وعد الحُر } .. أنا يا سيّدي جيتك

[ عيوني ] ما تبي غيرك تحبك ، حيل ملهوفه
ولو أقدر أخبّي شي في وسط عيوني " خبيتك "

حبيب القلب لك شاعر خذا من عينك وصوفه
تغزّل فيك - من بد الخلايق ، و إرتفَع صيتك

أنا .. يا ملهم أفكاري أشوفك مثل : معزوفه
وأمانه ، إعذر إحساسي إذا في يوم ، غنيتك

وعد يا " زهرةٍ "من جنة الأحلام .. مقطوفه
أصير الأرض وأنبت لك زهر عمرك وحنيتك
:

- متعب التركي ،

[ 8 ] ..

عوّدتني . غير " قلبك " ما يسلّيني
وعلّمتني مهما شفت الهَم ما أحكي

تطمّن ، بخير ( عايش ) يا معنّيني
نفسي عزيزه لغير اللـه ما أشكي

إنت الوحيد .. إللي في إيدك تخلّيني
في وقت واحد حبيبي أضحك وأبكي !

تدري شسوّي بـ غيابك يا مبكّيني ؟
أشتاق وأقرا قصايد { متعب التركي }

:

- بحر الغياب ،

[ 9 ] ..

أساحلك
لا يجي طاري الفراق لـ ساحلك
قلبي سفينة شوق يا بحر الغياب
وكل مجاديفي [ ذهاب بـلا إياب ]
غرقان قلبي وصاحـ لك !

بس لقّني - الشهاده ،
وألفظ أنفاسي الأخيره
ما أبي منّك " سعاده "
في حياتي الموت خِيره
إعتبرني حلم تفسيره نهايه
وإلا واحد منتهي قبل البدايه
- عندك أعذارٍ كثيره

إختياري لك { خطا }
و إختيارك لي صواب
أسألك ، وين العطا ؟
وأدري ماعندك جواب
يا مطوّل غيبتك وين الغنايم ؟
حتي عنّك ياحبيبي كنت صايم
أطلب اللــه الثواب

:

- وجه اللقى ،

[ 10 ] ..

قالت الفرقى : أبيها ، وقلت : تَم
والله سوَّتها ! - و قالت : هاتَهَا ..!

قلت وينك يا المفارق قال : سَم !
وسلّمَتْ له . . - نفسَهَا و خطواتَهَا ،

قلت روحي دام لك هـ الحب غَم
و إستغلّت { كلمتي } بـ سْكاتَهَا

السعاده عند مثلي ، تعني - هَم
و الأماني . . ما تفوته ... فاتَهَا !!

ولْ . . يا وجه اللقى ما فيك دَم
و دمعتي - ما تستحي ، وحياتَهَا

راحت ، وباقي لساني يقول : تَم
حاجةٍ كانت [ تبيها ] و . . جاتَهَا !

:

- سراب التلاقي ،

[ 11 ] ..

أنساك قول شلون لا صرت الأعماق
شقيت . من حبك ، وللحين - شاقي

علّمني " نسيانك " وأعلّمْك - تشتاق
ظامي [ وصالك ] ، يا سراب التلاقي

ضيّعت عمري لك من فراق لـ فراق
في ذمّتك . . وش عاجبك في فراقي ؟

عشّاق ! حنّا بـ الإسم بس { عشاق }
خلّص - شعور الحُب ونقول : باقي !

:

- أنواع الرطب ،

[ 12 ] ..

بداية :

من بعد غيبه تجي وتقول : وشلونك !
تحسبني ببقى أحبك دوم و " أحتاجك "
بـ كل صراحه ، أنا مرتاح من دونك
ما أبيك ترجع وتتأسف على إزعاجك

:

المشاعر لك حمَامه " مهاجره "
دام غيري تاه في أرضك و طَب

إللي باقي لي . لـ غيرك ذاخره
كان إسمك في حياتي و إنشطَب

قلبي شايل نخلتك ، من خاطره
لو هي تنتج أجوَد أنواع الرطَب

الزعل حاصر - حدود الذاكره
وما أظن في يوم بيطيح الحطَب

:

نهاية :

طاح " قلبك " من عيوني
وخفت أنا غيري يدوسه

:

- لا فات فوتك ،

[ 13 ] ..

لا تْحط إيدك بوسط الحريق
ولا تيأس إن شفت منهم ردا

الدنيا بك .. ما أبيها تضيق
عمري و حياتي ، لأجلك فدا

ياصاحبي لا أشوفك غريق
مايفيد لا فات فوتك [ ندا ]

فـ ( إمّا حياةٌ - تَسرُّ صديق
وإمّا مماتٌ . . يغيظُ العِدا )

:

- هذا وجه الضيف ،

[ 14 ] ..

جا يقول : آمر ، ومنّي وش تبي
خاطري .. تنسى همومك و الوجَع

قلت له قلبك : ( مناي ومطلبي )
شوف فرحي كيف بغيابك " هجَع "

بي خطايا ماني معصوم ونبي
و قلبي من ذنبي و أفعالي " فجَع "

لا تسمّي من وفا قلبه [ غبي ]
ولا تخون إللي بـ ألحانك سجَع

قال برجع لك : وأحقق ماتبي
وهذا وجه الضيف راح ومارجَع

:

- ريق الرجا ،

[ 15 ] ..

نشف ريق الرجا وجيت ظامي
أبي تسمَع ... يافاقدني كلامي !
غذاء الروح عنْك القلب صايم
أمانه لا تجي وتجرح صيامي

تبيني شلون أرجع - فيك أأمّن !
وسرقت القلب مّني يا " حرامي " !
كثير أشياء تمنعني ( أسامح )
تغيّر كل شي ، حتى " سلامي "

تقول الحُب : مات ! و لك أقول :
تموت قلوب ويبقى الحُب سامي
وقلبي صار من فرقاك { ميّت }
وطاري ( الحُب ) آخر إهتمامي

:

- هنيالك ،

[ 16 ] ..

قدرت تعيش في حالك
ولا تتغيّر . . . أحوالك
و أنا - مو قادر الفرقى
- هنيالك - هنيالك -

هقيتك .. ما تخليني
لأنك - عايشٍ فيني
كفايه
إن طحت من عيني
نزل لك قلبي وشالك
- هنيالك - هنيالك -

تسوي في غيابي عرس !
ياسادس هالحواس الخمس
عجزت أستوعبه هالدرس
محد في الدنيا يصفالك
- هنيالك - هنيالك -

:

- بنات أفكاري ،

[ 17 ] ..

أدري بـ غيابي عايشه مقهوره
وأدري تتابعها جميع ( أخباري )

تقرا القصايد - تشتكي للصوره
أخطي وتخلق لي معاي أعذاري !

بعض القصايد عنّها [ محظوره ]
ويا كثر ما خانوا " بنات أفكاري "

خايف عليها من الشعر وشعوره
قولوا لها : لا تندمج بـ أشعاري

:

- حبيبي بـ الإسم ،

[ 18 ] ..

ترسم جروحي على قلبي - رَسِم
تسلم إيدك كنت قاسي يا الحبيب

كيف تجرحني وتبيني [ أبتسِم ] !
شي غريب إللي تقوله شي غريب

الألم بـ النفس ماهو بـ الجسِم
يعني أدري فيني ماينفع - طبيب

إنت ياللي إسمك حبيبي بـ الإسِم
كنت أظنك .... ما تخليني وتغيب

تدري ليه - القلب ممكن ينقسِم ؟
لأنه أعز الناس يطعن من قريب

:

- قفص صدري ،

[ 19 ] ..

يا أوّل من خذا من " كف " خيري
مشى قلبي عشانك فوق ( جمرك )

قضى عمري أنا .. ضايع مصيري
ما بين : الشوق واللهفه وعمرك

- ضميرك ليش ما قدّر [ ضميري ] ؟
أبي منّك عذر مُقنع و .. أعذرك

أنا عطري ، يشمّه فيك " غيري "
وأشم إيدي ألاقي فيها : عطرك !

خلا بعدك قفص صدري ياطيري
وكثير طيور أدري وسط صدرك !

:

- برجع للحبيب ،

[ 20 ] ..

صاحبي المجروح يشكي للطبيب
عن وطن عمره و حياته والزمن

قال - يا دكتور : برجع للحبيب
ومستعد .. أدفع حياتي لك [ ثمن ]

قال له - يا سيّدي حالك : كئيب
كيف أعالج شخص لابس له كفن !

إسأل اللي جرّب الفرقى يجيب ،
مايحس الحزن إلا من ( حَزَن )

:

- ندوي ،

[ 21 ] ..

- للحسن ناسه ، وشيخة الحسن : ندّوي

الله يعين الشُوف يا ( عارف سرور )
تحتاج - نظاره { الكبر شين } يا أبوي

تبي تسوي ليزك ؟ آعرف [ دكتور ]
سوّى - عيون كثار وآخرهم " أخوي "

من قلت عنْهَا : جيكره ! قلت : بغرور
للحسن ناسه ، وشيخة الحسن : ندّوي

:

- فطّومه ،

[ 22 ] ..

يزيد حبي لها هـ البنت في كل يوم
عندي الأوادم في كف ، و كف فطّومه

أدعي لها ربّي يحميها في شهر الصوم
ومن الخطايا تكون - إنسانه معصومه

يكفي ليامن سألت و قلت : يا فطّوم
من هي : حبيبة أبوها ؟ تقول : فتّومه

:

- عيون أمّوله ،

[ 23 ] ..

كل شي أقوله : تحبه ومثلي تقوله
تسمع كلامي ، وتقعد دايماً " يمّي "

إن جيت تفْرَح وإذا غايب علي توله
هذي الأمل غير عنهم شايله همّي

الغالي يرخص عشان عيون أمّوله
يكفي إسمها خذيته من إسم : أُمّي

:

- ليلة القدر ،

[ 24 ] ..

مدام التوبه : مقبوله ، ( أمانه ) . لا يفوت الفوت
ومن يدعي في هـ الليله له الرحمه ، بلا مقياس

عيونٍ تبكي من كثر الخشوع وفي بُكاها : صوت
وعيون تغرّها الدنيا بِكَتْ ياما [ بدون إحساس ] !

قلوبٍ تطلِب التوبه - سخيّه ، ما تهاب ( الموت )
وقلوب ذنوبها { واجد } سِكَنْهَا الخوف والوسواس

طلبتك .. يإللي نجّيت النبي يونس في بطن الحوت
تبلّغنا - فضل [ ليله ] .. تحرّوها " قلوب الناس "

:

- عيدك مبارك ،

[ 25 ] ..

أبرك الساعات عندي ساعتك
قلبي بيتك والنظر في العين دارك

لي مشاعر ، وافيَه ما باعتك
مهما تبعد - ترتجيك وبـ إنتظارك

لا تخليني في يوم ( وداعتك )
العيد فرحه ودّي في عيدك أشارك

الله يتقبّل حبيبي .. [ طاعتك ]
وقبل كل الناس في " عيدك أبارك "

:

- فراشي ،

[ 26 ] ..

ممكن تحب غيري وتنسى مع الوقْت
لا صار صوبك كم [ حاقد ] و [ واشي ]

أتعَب و أسقي زهرة الحُب ما ذقْت
ويجي ، على الراحه .. وياخذ فراشي !

وممكن تجيك أخبار إنّي أنا : رقْت
مستانس بفرقاك .. و زادوا - معاشي

تدري إذا مرّيت في حلمي ، و فِقْت
أتعطّر بـ طاريك .. وأحضن ( فراشي )

:

- ريشه ،

[ 27 ] ..

كثير أشياء تبْعِدْني ، ومنهم :
لِعِب قلبك - و كذباته وطيشه

رِجَع جيش المشاعر لْـ وطنهم
وسَحَب قلبي أحاسيسه وجيشه

كثير أحباب مثلي ، خاب ظنهم
معاي " الدُّور " تكفى لا تعيشه

مثل هـ الناس ومنتَ غير عنهم
على راسك ، ترى ما فيه ريشه

:

- العيد عيدين ،

[ 28 ] ..

فرقاك عندي [ عيد ] وقلبك خسرني
ما قلت لك لا تجرحي الجرح لك دين

شوفي على جرحك ضميري جبرني
وأبشّرك ، مرتاح .. وما أبي تردين

قلبك تحسّف .. إنْ طروني و ذكرني
وقلبي ليا صرت أذكرك قال : بعدين !

ماعاش منهو في " غيابه " كسرني
عيد { الفطر و فْراقك } العيد عيدين

:

- عيدكم مبارك ،

[ 29 ] ..

كما ختمتها معكم العام الماضي
سـ أقول أيضاً :

[ الجمر ] .. مهما طال وقته يرمِّد
وإذا طفت ناري أمانه .. إعذروني

كتبت ,, وغيري من وجودي تجمَّد
وكلَّه عشان ( عيونكم ) , صدّقوني

ما أتْعمَّد أخْسِر شخص لو هو تعمَّد
وكثير من حولي خطوا وخسروني !

لو جا رمضان الجاي من غير " أحمد "
أقل شي .. بـ ( الخير ) بس إذكروني

:

غدًا ..
أول أيام عيد الفطر ..
أعاده الله علينا وعليكم أعوامًا وأعوام ...

29 يوم ..
29 قصيدة كتبتُ لكم من القلب هُنا ...
و لو أنّني قد كتبتُ مايزيد عن ذلك ...
أدرك تمامًا بأننّي لن أصل لذائقة قلوبكم ...

شكرًا لكل من تابعني هُنا ..
شكرًا لكل من قرأ أحمد الصانع ....

أعيادكم فرح